Analistët e kanë cilësuar seancën e sotme të mos konstituimit të Kuvendit të Kosovës si një imazh të keq për vendin në arenën ndërkombëtare.

“Kjo seancë e konstituimit ka nisur keq, në kuptimin që përfunduam në lajme ndërkombëtare. Imazhi i Kosovës në fillim të vitit 2025 është katastrofal nëse vazhdon kështu me papërgjegjësi kjo klasë politike. Është dashur të konstituohet kryetari i Kuvendit, të kemi parlament, pastaj a i ka numrat apo jo qeveria, është çështje tjetër”, ka thënë analisti Muhamet Hajrullahu.

Analistja Fatime Hajdari, në anën tjetër, ka thënë se mos konstituimi i legjislaturës së re ka qenë veprim i pastër politik.

“Ajo që sot e kemi parë ka qenë veprim puro politik nga opozita. Mendoj që ata e kanë parë të sigurt se do të kemi jo vetëm votimin e kryetarit të Kuvendit, por edhe të Qeverisë. Pastaj, nga frika se mos dikush nga votat e tyre do të lëvizë, e kanë parë të arsyeshme mosvotimin e raportit për marrjen e mandateve. Paqartësi juridike nuk kemi,” ka thënë ajo.

Ndërkaq, profesori Kadri Kryeziu ka thënë se dorëheqja e kryeministrit Albin Kurti nuk ka bazë ligjore.

“Kur Kuvendi nuk është në funksion, kryeministri nuk ka mundësi të japë dorëheqje. Në momentin kur e ka marrë detyrën e deputetit, nuk e ka marrë si kryeministër, por si individ. Ai moment krijon një marrëdhënie të re juridike të karakterit politik. Kjo nënkupton që a me qenë deputet apo ministër, nuk është fjala për qeveri në detyrë,” ka thënë ai.

Kritika janë shtruar për deputetët e NISMA-s, të cilët, sipas profesoreshës Besa Luzha, po bllokojnë procese.

“Këtu është bllokimi dhe shantazhi i pakicave jo serbe ndaj shumicës. 3 votat e NISMA-s kanë qenë për, 11 të tjera kanë munguar,” ka thënë ajo në RTK Prime.

Sot ka dështuar konstituimi i Kuvendit të Kosovës, pasi nuk u miratua raporti i Komisionit për Verifikimin e Mandateve. Krerët e partive politike, të PDK-së, LDK-së dhe AAK-së, nëpërmjet postimeve në Facebook, kanë kërkuar dorëheqjen e Albin Kurtit nga pozita e kryeministrit, ndonëse ky i fundit ka dorëzuar një letër ku shkruan se jep dorëheqje nga ky post para betimit të tij si deputet.